Transportes inviste 1,4 millóns na reparación de dous noiros da A-54 en Guntín
O Ministerio de Transportes e Mobilidade Sostible continúa cos traballos de reparación de dous noiros da autovía A-54 ao seu paso por Guntín, afectados polas sucesivas borrascas rexistradas na provincia de Lugo entre novembro de 2025 e febreiro de 2026. As actuacións contan cun investimento de 1,4 millóns de euros, IVE incluído.
Os traballos desenvolveranse nos puntos quilométricos 13,9 e 20,2 da A-54, ambos na marxe esquerda da autovía. Para garantir a seguridade dos usuarios e dos operarios, será necesario aplicar restricións ao tráfico durante os próximos meses en diferentes tramos da vía.
En concreto, desde o luns 28 de setembro ata o 18 de decembro permanecerá cortada a calzada esquerda entre os puntos quilométricos 19,3 e 21,28. Posteriormente, desde as 8:00 horas do 2 de novembro ata o 29 de xaneiro de 2027, o corte afectará o tramo comprendido entre os puntos quilométricos 12,5 e 17.
Durante os períodos de afectación habilitaranse itinerarios alternativos debidamente sinalizados pola calzada contraria, é dicir, pola dereita da autovía.
As actuacións previstas inclúen inicialmente a retirada de toda a masa de terras desprazada como consecuencia dos desprendementos. Posteriormente, os noiros serán estabilizados mediante a construción de muros de escollera, a instalación de bulóns e a execución de drenes californianos.