Vilalvite acollerá unha charla sobre prevención de incendios no ámbito rural este sábado
A Escola de Vilalvite será escenario este sábado, 27 de xuño, dunha charla centrada na prevención de incendios no ámbito rural, unha iniciativa que busca concienciar á veciñanza sobre a importancia das medidas preventivas fronte ao risco de lumes forestais.
A actividade dará comezo ás 10.30 horas e contará coa participación de varios especialistas vinculados á prevención e extinción de incendios. Entre os relatorios previstos figuran o de Ignacio Mosquera Niebla, bombeiro retirado; un bombeiro forestal; e Antonio Rigueiro Rodríguez, catedrático emérito da Universidade de Santiago de Compostela e doutor en Enxeñaría de Montes.
A organización destaca que a xornada pretende ofrecer información práctica e coñecementos técnicos sobre a prevención dos incendios, especialmente no medio rural, onde o risco aumenta durante os meses de verán.
A asistencia require inscrición previa obrigatoria, que deberá formalizarse a través do correo electrónico comuneros.vilalvite@gmail.com.
A charla está organizada pola presidenta da Comunidade de Montes Veciñais en Man Común de Vilalvite, Mónica Couce Rigueiro, e polo bombeiro forestal Javier Telmo Vázquez.