Xulio do Canelo e Yolanda Díaz Gallego recibirán os Premios Mestras e Mestres da Memoria 2026 en Lugo
Xulio do Canelo e Yolanda Díaz Gallego serán distinguidos como Mestra e Mestres da Memoria 2026 polas súas contribucións á conservación da tradición oral, o saber popular e a memoria colectiva ao longo das súas vidas. A entrega dos recoñecementos terá lugar este venres 23 de outubro, a partir das 18:00 horas, na sala de exposicións da Deputación de Lugo, situada na rúa San Marcos, número 8.
A XI Gala dos Premios Mestras e Mestres da Memoria está organizada pola Asociación de Escritoras e Escritores en Lingua Galega (AELG), a través da súa Sección de Literatura de Tradición Oral, e conta co apoio do Concello de Lugo e a colaboración da Deputación provincial. A entrada será libre ata completar a capacidade do recinto.
A elección das persoas homenaxeadas foi realizada a proposta dun grupo de traballo da AELG, integrado por Ana Acuña, Félix Castro Vicente, Carme Pernas Bermúdez, Calros Solla, Xurxo Souto, Cesáreo Sánchez Iglesias, Xosé Manuel Varela, Lois Pérez e Antonio Reigosa. Tras a deliberación, a proposta foi elevada ao Consello Directivo da asociación.
O acto estará conducido por Lois Pérez e contará coa participación de Cesáreo Sánchez Iglesias, presidente da AELG. Pola súa banda, Antonio Reigosa será o encargado de ler a *laudatio* dedicada a Xulio do Canelo, mentres que Lucía Arroxo fará o propio coa de Yolanda Díaz Gallego.
A xornada completarase co acompañamento musical de Secho, nun encontro que busca poñer en valor o legado das persoas que contribuíron a preservar e transmitir a riqueza da cultura popular galega.