Infraestructuras

A Xunta propón adxudicar as obras dunha promoción de máis de 23.000 metros cadrados en Lugo, con pisos de entre un e catro dormitorios

Imaxe doutras vivendas da Xunta en Garabolos

A Xunta deu un novo paso para ampliar o parque de vivenda pública en Lugo coa proposta de adxudicación, por 24,2 millóns de euros, das obras para construír 152 novas vivendas no barrio de Garabolos. A promoción fora licitada inicialmente por 26,5 millóns de euros e recibira dez ofertas.

O novo edificio contará con máis de 23.000 metros cadrados de superficie construída e terá planta baixa, oito alturas e baixo cuberta. As vivendas serán de un, dous, tres e catro dormitorios e estarán acompañadas de servizos e comunicacións internas, cun deseño pensado para integrarse na contorna.

Esta actuación non debe confundirse coas 146 vivendas que xa están en obras en Garabolos, correspondentes a outras dúas promocións. Unha delas, de 70 fogares, comezou a executarse en 2025, mentres que a outra suma 76 vivendas.

A estas promocións súmanse agora as 152 cuxas obras están a piques de ser adxudicadas e outras 168 vivendas que a Xunta acaba de sacar a licitación, cun orzamento de 29,6 millóns de euros. As empresas interesadas poderán presentar as súas ofertas ata o 20 de outubro.

Deste xeito, Garabolos concentra xa 466 vivendas públicas entre as que están en obras, as que teñen proposta de adxudicación e as que acaban de saír a licitación. A cifra dá unha idea da dimensión que está a adquirir este barrio dentro da expansión da vivenda pública na cidade.

No conxunto de Lugo, a Xunta asegura ter en marcha máis de 600 vivendas de promoción pública, das que 146 xa se atopan en obras. Estas actuacións forman parte do obxectivo de incrementar a oferta de vivenda protexida na cidade.

A expansión residencial tamén terá outro foco no Sagrado Corazón, onde o desenvolvemento de novo solo permitirá construír arredor de 1.200 vivendas, das que o 80% estarán protexidas.

Con estas actuacións, Garabolos sitúase como un dos principais puntos de crecemento da vivenda pública en Lugo, cunha sucesión de promocións que permitirá incorporar centos de novos fogares nos próximos anos.