A A-6 terá cortes nocturnos nos túneles de Pedrafita, Trabadelo e Villafranca do 26 ao 30 de outubro
O Ministerio de Transportes e Mobilidade Sostible realizará traballos de revisión e mantemento dos sistemas de ventilación dos túneles de Pedrafita do Cebreiro, na provincia de Lugo, e de Trabadelo e Villafranca, en León. As actuacións obrigarán a cortar alternativamente distintos tramos da autovía A-6 durante catro noites, entre o luns 26 e o venres 30 de outubro, en horario de 22:00 a 06:00 horas.
Os cortes afectarán tanto á circulación en sentido A Coruña como á de Madrid. Nas noites do luns 26 ao martes 27 e do xoves 29 ao venres 30, as restricións aplicaranse na calzada dereita, en dirección A Coruña, entre os quilómetros 407 e 415, correspondentes aos túneles de Villafranca e Trabadelo, e entre os puntos quilométricos 431 e 432, no túnel de Pedrafita.
Pola súa banda, nas noites do martes 27 ao mércores 28 e do mércores 28 ao xoves 29, os cortes trasladaranse á calzada esquerda, en sentido Madrid. Neste caso, afectarán aos tramos comprendidos entre os quilómetros 415 e 407 e entre o 432 e o 431.
Durante as restricións habilitaranse itinerarios alternativos pola estrada N-6, entre os enlaces de Villafranca del Bierzo, no quilómetro 407, e Trabadelo, no 415, así como pola contorna de Pedrafita do Cebreiro, entre os puntos quilométricos 431 e 432. Os desvíos dependerán do sentido de circulación afectado en cada momento.
Ademais, non estará permitido o paso de vehículos que transporten mercadorías perigosas polo túnel de Villafranca situado no quilómetro 406 da N-6.
Estas intervencións chegan despois das obras de modernización dos túneles do porto de Pedrafita, na A-6, e de Montefurado, na N-120. Os traballos anteriores contaron cun investimento de 24,7 millóns de euros, dos cales 18,3 millóns procederon de fondos europeos do Plan de Recuperación, Transformación e Resiliencia. Os 6,4 millóns restantes destináronse a actuacións adicionais nos sistemas de ventilación e financiáronse con fondos estatais.