A Xunta de Goberno de Lugo adxudica tres obras e licita outras dúas por 2,4 millóns de euros
A Xunta de Goberno Local de Lugo adxudicou tres obras e aprobou a licitación doutras dúas actuacións por un importe conxunto de 2.414.126,40 euros, segundo informou o Goberno municipal. Os proxectos permitirán actuar en diferentes puntos da cidade e nas parroquias, con intervencións relacionadas coa mobilidade, o abastecemento de auga, a mellora de espazos públicos e as conexións viarias.
Entre as actuacións adxudicadas atópase a pavimentación do Camiño Primitivo en San Lázaro, no barrio da Ponte, que será executada pola empresa Cholo, S.L. por un importe de 205.200,36 euros. O prazo previsto para completar os traballos é de tres meses.
Tamén foi adxudicada a actuación de abastecemento de auga en San Martiño de Ombreiro, incluída no Plan Provincial Único de Cooperación 2026. A obra correrá a cargo de Ogalia Contratas por 233.530 euros e contará cun prazo de execución de tres meses.
A terceira obra adxudicada corresponde á pasarela peonil da Ronda da República Argentina, que será executada pola UTE formada por Citanias Obras y Servicios e Geocaminos por 1.115.361,22 euros. O prazo máximo de execución será de sete meses e trece días.
A nova infraestrutura permitirá avanzar na mellora da mobilidade peonil e da accesibilidade nesta zona da cidade. Ademais, a oferta presentada pola empresa inclúe unha ampliación de 36 meses sobre o prazo mínimo de garantía, polo que a actuación contará cunha garantía total de cinco anos.
O Partido Popular lembrou que esta infraestrutura xa fora proposta por esta formación no Pleno de xullo de 2021. Segundo sinala o PP, naquela ocasión PSOE e BNG votaron en contra da iniciativa para impulsar a pasarela.
Ademais das tres obras adxudicadas, a alcaldesa asinou dous decretos para iniciar a licitación doutras dúas intervencións. Unha delas corresponde ás obras de humanización do parque de San Lorenzo, cun orzamento de 469.254,17 euros.
A segunda actuación será o vial de conexión entre Río Eo e Otero Pedrayo, no barrio de Paradai, cun importe de 390.780,57 euros.
O Goberno municipal destacou que se trata de actuacións de diferente natureza, pero que responden a un mesmo obxectivo. «Son actuacións moi diferentes entre si, pero todas responden a unha mesma forma de traballar: atender necesidades concretas, desbloquear expedientes e avanzar en solucións que melloran os barrios, as parroquias e a vida cotiá dos lucenses», sinalaron.
28.000 euros para dinamización económica
A Xunta de Goberno Local tamén aprobou unha convocatoria de 28.000 euros en subvencións destinadas a apoiar proxectos de dinamización económica promovidos por entidades sen ánimo de lucro.
As axudas están impulsadas pola Concellería de Dinamización Económica e poderán alcanzar un máximo de 2.000 euros por solicitante. O obxectivo é financiar actuacións destinadas a impulsar a actividade económica, empresarial e comercial, así como o emprego e a hostalería no termo municipal de Lugo.