O BNG pedirá á Xunta unha maior distancia entre as plantas de biogás e as vivendas
O BNG de Lugo levará ao vindeiro pleno municipal unha proposición para reclamar á Xunta de Galicia un marco normativo máis esixente para a instalación de industrias potencialmente contaminantes, con especial atención ás plantas de biogás. A formación nacionalista defenderá que a lexislación autonómica estableza distancias mínimas respecto das vivendas e dos núcleos de poboación, así como condicións sobre o tamaño das instalacións e a xestión dos residuos.
O portavoz do BNG no Concello de Lugo, Rubén Arroxo, considera que a modificación da Ordenanza Municipal de Protección Ambiental que o PP prevé levar ao pleno supón un avance, pero advirte de que pode resultar insuficiente no caso dos proxectos declarados de interese estratéxico pola Xunta.
"A actualización da Ordenanza Municipal de Protección Ambiental é un paso necesario e importante, pero pode quedar nun xesto simbólico ante os proxectos de interese estratéxico da Xunta, que non teñen a obriga de cumprir as normativas municipais", afirmou Arroxo.
O BNG pide aplicar tamén os 3 quilómetros
A proposta dos nacionalistas pretende que a normativa galega incorpore unha separación de 3 quilómetros entre este tipo de instalacións e as vivendas e núcleos habitados, a mesma distancia que contempla a modificación da ordenanza municipal que o PP levará ao pleno.
"Non abonda con aprobar ordenanzas municipais se despois a Xunta pode aprobar proxectos que non teñan que cumprir esa ordenanza", sinalou Arroxo.
O portavoz do BNG lembrou ademais que o pleno municipal xa aprobou en 2025 unha iniciativa da súa formación para reclamar unha maior protección legal fronte a este tipo de instalacións, que daquela non contou co apoio do PP.
Para os nacionalistas, a regulación autonómica debe establecer unhas condicións claras que permitan compatibilizar a implantación de actividade industrial coa protección das persoas que viven nas zonas afectadas.
Os proxectos estratéxicos, no centro da reclamación
O BNG pon o foco na figura dos proxectos industriais estratéxicos (PIE), ao considerar que esta vía concentra na Xunta unha parte importante da capacidade de decisión e limita o papel dos concellos.
"A figura dos proxectos de interese estratéxico concentra a capacidade de decisión na Xunta e reduce o papel dos concellos", explicou Arroxo, que defendeu a necesidade de que o Goberno galego estableza regras comúns para todo o territorio.
A formación nacionalista reclama así unha regulación que determine non só a distancia respecto das vivendas, senón tamén cuestións relacionadas co tamaño das plantas e co tratamento e xestión dos residuos.
O BNG basea parte da súa argumentación na Lei 9/2021, do 25 de febreiro, de simplificación administrativa e apoio á reactivación económica de Galicia. Esta norma modificou as disposicións legais autonómicas en materia de política industrial e introduciu cambios no artigo 80 do texto refundido correspondente aos efectos da declaración dun proxecto industrial estratéxico.
Entre estes efectos figura a "non suxeición aos títulos habilitantes urbanísticos de competencia municipal", así como a declaración de incidencia supramunicipal e a consideración de urxencia ou excepcional interese público nos termos establecidos pola normativa.
Para Arroxo, esta situación fai necesario que a Xunta fixe unhas condicións ambientais e de protección da poboación suficientemente estritas para evitar que a declaración dun proxecto como estratéxico deixe sen efecto as garantías establecidas a nivel municipal.