O BNG reclama activar unha nova ruta de taxi a demanda para seis parroquias de Lugo
O BNG de Lugo levará ao próximo pleno municipal unha proposta para poñer en marcha unha nova ruta de Transporte Rural a Demanda que conecte seis parroquias coa cidade. A iniciativa contempla dar servizo a Orbazai, Adai, Ombreiro, Piúgos, Cuíña e Saa, dentro do plan de ampliación que a formación nacionalista asegura que deixou preparado antes da moción de censura.
O portavoz do BNG, Rubén Arroxo, mantivo encontros coa veciñanza de distintas parroquias, entre elas Saa, Ombreiro, Cuíña e Piúgos, para explicar o funcionamento do proxecto e reclamar que o goberno municipal retome a súa implantación. Segundo indicou, a nova ruta constitúe o segundo paso previsto para estender este modelo de mobilidade ao rural lucense.
"Conseguimos iniciar en Lugo un proxecto totalmente revolucionario e innovador, que é avanzar en que todo o rural, as 54 parroquias, poidan ter transporte público a través do servizo de taxi a demanda", afirmou Arroxo. O concelleiro avanzou que o BNG defenderá no pleno a activación da nova conexión para dar continuidade ao traballo iniciado desde a área de Mobilidade.
A formación lembra que o Concello puxo en marcha o pasado mes de febreiro unha experiencia piloto nas parroquias de Carballido e Labio, tras varios anos de preparación. Segundo Arroxo, a iniciativa tivo unha boa acollida entre a veciñanza e pretendía avanzar de maneira progresiva cara a un sistema que permitise conectar os núcleos rurais cos servizos da cidade.
O servizo está pensado para as zonas ás que non chega o autobús urbano. As persoas usuarias poden solicitar un desprazamento en taxi con reserva previa e pagar unha tarifa equivalente á do bus urbano. O modelo busca ofrecer unha alternativa asumible para facilitar os traslados desde o rural, sen necesidade de estender as liñas convencionais de autobús ás 54 parroquias.
Para organizar o funcionamento, tamén estaba prevista a creación dunha plataforma de control que permitise rexistrar a demanda e os percorridos realizados polos vehículos. O BNG defende que a extensión do taxi a demanda facilitaría o acceso da veciñanza rural aos servizos e recursos situados na cidade.