O CD Lugo achega o fútbol e os valores do deporte ao alumnado do CEIP Laverde Ruíz de Outeiro de Rei
O Club Deportivo Lugo continúa desenvolvendo o programa "CD Lugo na Escola", unha iniciativa impulsada xunto coa Vicepresidencia da Deputación de Lugo para achegar o club e os valores do deporte aos máis pequenos. Nesta ocasión, a actividade chegou ao CEIP Laverde Ruíz de Outeiro de Rei, onde os xogadores do primeiro equipo Kike Hermoso e Álex Costa compartiron unha mañá co alumnado.
Durante o encontro, os dous futbolistas participaron nunha charla distendida na que responderon ás preguntas dos escolares, contaron anécdotas e compartiron experiencias dentro e fóra dos terreos de xogo. A visita tamén incluíu fotografías, sinaturas de autógrafos e o reparto de tarxetas personalizadas como recordo da xornada.
Ademais, Hermoso e Costa entregaron invitacións para o partido que o CD Lugo disputará este domingo contra o CD Mirandés, ás 16:30 horas, no estadio Anxo Carro. O club animou o alumnado a acudir ao encontro e apoiar o equipo nunha cita na que buscará sumar unha nova vitoria co respaldo da súa afección.
Desde o CD Lugo agradeceron ao CEIP Laverde Ruíz a acollida e o cariño recibidos durante a visita, que permitiu compartir unha mañá especial coa comunidade educativa do centro.