O antigo colexio do Sagrado Corazón xa é municipal e abre a porta ao novo centro de saúde
O antigo colexio do Sagrado Corazón xa pertence oficialmente ao Concello de Lugo. A sinatura da acta de expropiación permite desbloquear as instalacións e avanzar na planificación do futuro centro de saúde do barrio, unha infraestrutura que contará cun investimento próximo aos cinco millóns de euros.
A alcaldesa de Lugo, Elena Candia, destacou que a recuperación do inmoble era un compromiso co barrio e sinalou o significado de volver acceder ás instalacións acompañada pola veciñanza. "Cando asumimos o Goberno municipal dixemos que iamos recuperar este espazo para o barrio. Hoxe damos ese paso", afirmou.
Candia lembrou tamén o pasado educativo do edificio e apuntou que agora se abre unha nova etapa para o complexo. "Neste lugar estiveron as aulas nas que durante anos se formaron moitos nenos e nenas do barrio. Agora comeza unha nova etapa para estas instalacións", indicou.
O principal uso previsto será a construción do novo centro de saúde na zona actualmente ocupada pola pista polideportiva. O equipamento terá unha superficie sanitaria de 1.600 metros cadrados e dará asistencia a preto de 10.000 persoas.
O centro contará con sete consultas de medicina familiar e comunitaria e outras sete de enfermería, ademais dunha área de pediatría, unha sala para a toma de mostras e espazos destinados á docencia, entre outras dependencias necesarias para o funcionamento da infraestrutura sanitaria.
O anteproxecto elaborado pola Xunta contempla o derribo das antigas instalacións educativas para facer posible a construción do centro, aínda que se manterá o salón de actos, atendendo así á petición formulada polo Concello.
Unha pista deportiva aberta mentres avanza o proxecto
Mentres non se execute o novo centro de saúde, o Concello prevé intervir na pista deportiva para poder abrila provisionalmente e poñela ao servizo da veciñanza do barrio.
O proxecto municipal tamén contempla a recuperación de espazos comúns, entre eles o salón de actos, así como o estudo doutras alternativas para incorporar novos servizos ao complexo coa participación dos veciños.
Outro dos eixes de actuación será a mellora da accesibilidade do edificio situado na vía que comunica as rúas do Sagrado Corazón e Fontaneira. Neste inmoble residen 21 familias e linda directamente coa pista deportiva, polo que se buscará unha solución técnica para resolver os problemas de acceso.
A Xunta prevé licitar a redacción do proxecto en 2027
A ocupación dos terreos abre agora unha nova fase na tramitación do futuro centro de saúde. Os seguintes pasos serán a inscrición da parcela e a sinatura do convenio de colaboración e cesión dos terreos ao Servizo Galego de Saúde.
A previsión da Xunta é impulsar na primavera de 2027 a licitación para a redacción do proxecto, trámite previo á contratación das obras. Para avanzar cara á definición da infraestrutura, o Executivo galego xa encargara un estudo arquitectónico sobre o posible emprazamento e dispón dun anteproxecto que analiza as posibilidades de urbanización da parcela.
O conselleiro de Sanidade, Antonio Gómez Caamaño, asegurou durante a súa visita a Lugo que o proxecto entra agora nunha fase decisiva e que a Xunta traballará para axilizar os trámites. O responsable autonómico estivo acompañado pola alcaldesa de Lugo, Elena Candia, e polo delegado territorial da Xunta na provincia, Alfonso Villares.
Gómez Caamaño agradeceu a colaboración municipal e sinalou que a actuación permite desbloquear o principal escollo que, segundo indicou, impedira avanzar durante anos na posta en marcha deste equipamento sanitario.
"Dixemos que iamos facelo. Hoxe avanzamos para que este espazo volva ser público, teña novos usos e volva estar ao servizo dos veciños", concluíu a alcaldesa.