O PSOE cuestiona que a Xunta limite ao centro de saúde o futuro dos terreos do Sagrado Corazón
A decisión da Xunta de limitar a súa actuación nos terreos do antigo colexio do Sagrado Corazón á superficie necesaria para o novo centro de saúde provocou as críticas do portavoz socialista no Concello de Lugo, Miguel Fernández, que reclama aproveitar o conxunto da parcela para planificar novos servizos públicos no barrio.
Fernández sostén que a Xunta deu marcha atrás respecto do compromiso trasladado en maio de 2025 polo entón conselleiro de Sanidade, Antonio Gómez Caamaño, de asumir a titularidade da totalidade dos terreos e parte dos custos das demolicións. Para o socialista, o cambio de posición supón perder unha oportunidade para reservar solo dotacional nunha zona con capacidade de crecemento nos próximos anos.
O portavoz do PSOE lembra que o anterior Goberno municipal traballou para recuperar os terreos e poñelos á disposición da Xunta co obxectivo inicial de facilitar a construción do centro de saúde. A súa proposta, segundo explica, pasaba por aproveitar o espazo dispoñible para incorporar outros equipamentos en función das necesidades futuras do barrio.
Unha parcela para planificar novos equipamentos
Entre as necesidades que Fernández considera prioritarias sitúa unha escola infantil, un centro sociocultural e un centro de día. O socialista advirte de que o Sagrado Corazón combina unha poboación actualmente envellecida con posibilidades de expansión residencial, polo que considera necesario anticipar os servizos que serán necesarios no futuro.
"O Sagrado Corazón necesita unha escola infantil, un centro sociocultural e un centro de día. Non podemos conformarnos cun proxecto de mínimos cando temos diante unha oportunidade para planificar os servizos das próximas décadas", sinalou.
Fernández considera que o modelo seguido coa antiga Residencia podería aplicarse tamén neste caso, aproveitando unha gran parcela pública para concentrar diferentes equipamentos e dimensionándoos para as necesidades dos próximos anos.
Tamén pide valorar a conservación das edificacións existentes se tecnicamente resulta viable. "Se hai edificios que poden recuperarse, adiante coa recuperación", afirmou, ao tempo que advertiu de que unha eventual perda da parcela dificultaría a incorporación posterior de novos servizos.
Reclama unha posición máis firme do Concello
A situación tamén levou ao portavoz socialista a cuestionar o papel da alcaldesa, Elena Candia, fronte á Xunta. Fernández considera que o Concello debería reclamar o cumprimento do compromiso que, segundo asegura, foi trasladado publicamente pola Administración autonómica.
"Unha alcaldesa debe defender a cidade, especialmente cando unha administración superior incumpre un compromiso adquirido con ela e coa súa veciñanza. O que estamos vendo é xusto o contrario", afirmou.
O socialista reclama ademais que Xunta e Concello concreten que uso terá o conxunto dos terreos e critica que non exista, ao seu xuízo, unha planificación integral máis alá do futuro centro sanitario.
"Non estamos falando dunha promesa informal nin dunha interpretación do anterior Goberno. Foi un compromiso público da Xunta", asegurou Fernández, que pide á Administración autonómica que manteña a súa intención inicial e ao Goberno local que reclame o aproveitamento integral da parcela.
Para o portavoz socialista, o centro de saúde debe ser o punto de partida e non o límite da planificación deste espazo. "Lugo non pode aceptar proxectos de mínimos cando ten diante unha oportunidade de ouro para planificar os seus servizos públicos", concluíu.